पर्वत, असार २७–नेपाली काँग्रेसका केन्द्रीय सदस्य एवम् ब्यवस्थापिका संसद सदस्य अर्जुनप्रसाद जोशीले २०५८ सालबाट नियमित बजेट बिनियोजन गराउदै आएको मल्लाज सिंचाई आयोजनाको दिगोपनाका लागि स्थानीयले चिन्ता ब्यक्त गरेका छन् ।
लामो र भिरका कारण पटक–पटक नहर पहिरोको जोखिममा रहेको भन्दै स्थानीयले दिगोपनाका लागि सरकार र स्थानीयले ध्यान दिनुपर्ने बताए । उनीहरुले आयोजनाको दिगोपनासँगै सरकारले करोडौ रुपैयाँ गरेको लगानीबाट जनताले आयआर्जन गरी जिविकोपार्जन समेत गर्नुपर्नेमा जोड दिए । सिंचाई विकास सव डिभिजन पर्वत र माझफाँट महिला बचत तथा ऋण सहकारी लिमिटेडले मल्लाजमा आयोजना गरेको सिंचाई आयोजना सञ्चालन र ब्यवस्थापनमा सहकारीको भूमिका विषय अन्तरक्रियामा यस्तो बताएका हुन ।
कार्यक्रममा बोल्दै सिंचाई विकास सव डिभिजन पर्वतका प्रमुख राजेन्द्रकुमार श्रेष्ठले आयोजना पुरा भएपछि सरकारले निरन्तर बजेट नपठाउने भन्दै दिगो रुपमा आयोजना सञ्चालनका लागि स्थानीय सहकारीमार्फत जिम्मा लिनुपर्ने बताए । मल्लाज सिंचाई आयोजनामा सरकारले करोडौ रुपैयाँ लगानी गरेको भन्दै उनले अव आयोजना निर्माण पुरा भएपछि बजेट आउन रोकिने बताए । उनले आयोजनालाई दिगो बनाउनका लागि उपभोक्ताले सहकारीमार्फत भुमिका खेल्नुपर्नेमा जोड दिए ।
निर्माण पुरा हुन लागेका योजनाको भविष्यका बारेमा सिंचाई विकास सव डिभिजन पर्वत चिन्तित भएको उनले बताए । उनले स्थानीय सहकारीले जिम्मा लिएर आयोजना लाई दिगो गराउन आग्रह गरे । श्रेष्ठले आयोजना निर्माण भएपछि धेरै ठाउँमा आयआर्जनका विभिन्न कार्यक्रम भएको भन्दै मल्लाज सिंचाई आयोजना निर्माण भएपछि पनि उपभोक्ताले त्यसको भरपुर उपभोग गरेर विभिन्न आयमुलक काम गर्न सुझाव दिए ।
कार्यक्रममा नेपाल पत्रकार महासंघ पर्वतका अध्यक्ष छविलाल तिवारीले मल्लाज सिंचाई आयोजना जलजला–१, २, ३ र ४ कै भविष्य रहेको भन्दै त्यसलाई दिगो रुपमा सञ्चालन गर्ने विषयमा ध्यान दिन आग्रह गरे । आयोजनालाई दिगो बनाउनका लागि सिंचाई विकास सव डिभिजन पर्वतले सहकारीलाई अगाडी सारेकोमा उनले प्रशंसा गरे । उनले सरकारले करोडौ रुपैयाँ लगानी गरेको आयोजनाबाट त्यो लगानी भन्दा बढी उपभोक्ताले फाइदा लिनसक्नु पर्ने बताए ।
मल्लाजमा विभिन्न अन्नबालीका साथै तरकारी र फलफूल लगाउन सकिने भन्दै अध्यक्ष तिवारीले त्यसमा ध्यान दिन आग्रह गरे । नजिकैका बजारमा बाहिरबाट कृषिजन्य उत्पादनहरु आइरहेकोमा ध्यानाकर्षण गराउदै आत्मनिर्भरमा जोड दिनुपर्ने उनको भनाई रहेको थियो ।
कार्यक्रममा मल्लाज सिंचाई आयोजनाका अध्यक्ष टेकबहादुर जिसीले विगत डेढ दशकदेखि आयोजना निर्माणका लागि आफुले नेतृत्व लिइरहेको भन्दै लामो र अपठ्यारो ठाउँका कारण निरन्तरतामा चुनौति रहेको बताए । पहरा खोपेर बनाइएको कुलो समय–समयमा भासिने समस्याले अहिले पाइप राख्दा आवश्यक पानी ल्याउन नसकिएको बताए । २०३५ सालमा तत्कालिन राजा बिरेन्द्रको हुकुमीमा निर्माण सुरु भएको आयोजना रोकिदै सुरु हुदै गर्दा अहिलेपनि निर्माणकै चरणमा रहेको छ । जिसीले शाखा नहर निर्माणको अन्तिम अवस्थामा रहेपनि मुल नहर जोखिममा रहेको बताए । सचिव नरबहादुर जिसीले पनि माथिबाट आएको पहिरो पन्छाउन नसक्दा आवश्यक पानी ल्याउन नसकिएको गुनासो गरे । दुबैजनाले आयोजनाको निरन्तरताका लागि सहकारीलाई जिम्मा लगाउने कुरा निकै सकारात्मक भएको बताए ।
महिला बचत तथा ऋण सहकारीका अध्यक्ष शान्ता लामिछानेले आयोजनाबाट उपभोक्ताले आवश्यक फाइदा लिन नसकेकोमा स्वीकार गरिन् । नजिकै बजार रहेपनि तरकारी र फलफुल लगाएर फाइदा लिन नसकेको बताइन् । उनले माघपछाडी आयोजनाको नहरमा पानी ल्याउन नसकिने भन्दै बाह्रै महिना पानी आउने बनाएर सबै उपभोक्ताले आयोजनाबाट फाइदा लिन सक्नुपर्नेमा जोड दिइन् । लामिछानेको अध्यक्षतामा भएको कार्यक्रमको सञ्चालन सहकारीका प्रबन्धक कमला जिसी र स्वागत भगवती जिसीले गरेकी थिइन ।
मल्लाज सिंचाई आयोजना निर्माणपछि दिगोपनाको चिन्ता
