पर्वत, असोज २– जलजला गाउँपालिकाका अध्यक्ष एवम् नेपाली काँग्रेसका युवा नेता यामबहादुर मल्ल (रामकृष्ण)लाई नेपाली जनसम्पर्क समिति अमेरिकाले भब्य स्वागत तथा सम्मान गरेको छ । एटलान्टा नगरपालिकाले आयोजना गरेको स्मार्टसिटी सम्बन्धी सम्मेलनमा अमेरिका गएका मल्ल एटलान्टाबाट मेरील्याण्ड हुँदै न्युयोर्क पुग्दा नेपाली जनसम्पर्क समितिले भब्य सम्मान गरेको हो । समितिका सभापति आनन्द बिष्ट, सचिव मुनेन्द्र तामाङलगायत विभिन्न संघसंस्था र गैरआवासिय नेपालीले स्वागत तथा सम्मान गरेको नेपाली काँग्रेस पर्वतका क्षेत्रीय सदस्य एवम् केही बर्षदेखि अमेरिकामा बस्दै आएका हेमन मल्लले जानकारी दिए । आगामी छ महिनाभित्र अधिवेशन गर्ने तयारी गरेको नेपाली जनसम्पर्क समिति अमेरिकाले मल्ललाई स्वागत गर्दै जलजलामा आफुहरुले गर्नसक्ने कुरामा सहयोग गर्न तयार रहेको बताएका थिए । जलजलाका अध्यक्ष एवम् नेपाली काँग्रेस पर्वतका कोषाध्यक्षसमेत रहेका मल्लले जनसम्पर्क समितिको अधिवेशन एकताबद्ध र एकढिक्का भएर सम्पन्न गर्न आग्रह गर्दै जलजला गाउँपालिकासहित पर्वतमा जलबिद्युत, पर्यटन, होटल, केवलकारमा राम्रो सम्भावना भएकोले त्यसमा लगानी गर्न आग्रह गरेका थिए । भदौ २२ गते अमेरिका प्रस्थान गरेका मल्ल असोज ८ गते स्वदेश फर्कने भएका छन् ।
