पर्वत, असार १८–यहाँ गएराती गएको पहिरोमा परी एकैघरका तीन जनाको मृत्यु भएको छ । महाशिला–१ होश्राङ्दीमा गएराती गएको पहिरोले ६३ बर्षिय तिर्थबहादुर मल्ल ठकुरी, उनकी पत्नी ५५ बर्षिय यमकुमारी र ८० बर्षिय आमा बेलकुमारीको ज्यान गएको हो ।
मध्य राती गएको पहिरोले उनीहरु सुतिरहेको घर बगाएको हो । घर बगाएर बेपत्ता भएका तीन जनाको आइतबार बिहान पहिरो हटाएर शव निकालिएको महाशिला–१ का वडा अध्यक्ष इश्वरीप्रसाद भुसालले जानकारी दिए । ‘पुरिएका तीनै जनाको शव फेला परेको छ’ उनले भने । स्थानीयबासी र प्रहरीले पुरिएका शवहरु निकालेका हुन ।
पहिरोले स्थानीय डिमबहादुर मल्लको घरको आधा भाग बगाएको छ । डिमबहादुरको परिवार भने सकुशल रहेका छन् । तिर्थबहादुरको घरमा शनिबार बास बस्ने पाउना रहेको आशंका गरिएपनि अहिलेसम्म पत्ता नलागेको वडा अध्यक्ष भुसालले बताए । ‘तिर्थबहादुरको घरमा गएराती पाहुना समेत बास बसेको आशंका छ तर अहिलेसम्म केही प्रमाण फेला पारेका छैनौ’ उनले भने ।
पहिरोले दुई वटा गोठ समेत बगाएको छ । गोठमा रहेका एक दर्जनबढी पशुचौपाया पुरिएका छन् । ‘दुई वटा गोठमा रहेका भैसी, बाख्रा पहिरोले बगाएर बेपत्ता गराएको छ’ भुसालले नागरिक न्युजसँग भने–‘दुई वटा गोठमा भैसी, बाख्रा गरी एक दर्जनबढी पशु चौपाया रहेको अनुमान गरिएको छ ।’ पहिरोले घर बगाएर तीन जनाको ज्यान गएपछि अहिले महाशिला–१ होश्राङ्दीको सिंगो गाउँ नै शोकमा डुबेको छ ।
पर्वतको महाशिलामा पहिरोले बगाएर एकैघरका तीनको मृत्यु
