पर्वत, भदौ १३–नेपाली काँग्रेस पर्वतका पूर्वसभापति एवम् प्रदेश सभा सदस्य पदका उम्मेदवार नवराज गुरुङले जलजला गाउँपालिकाका बाढीपहिरो पीडितलाई राहत बितरण गरेका छन् । विभिन्न निकायसँग संकलन गरेर उनले बुधबार गाउँमै पुगेर ६० बढी परिवारलाई त्रिपाल बितरण गरेका हुन ।
बिदेशमा कार्यक्रममा गएका बेला जलजलामा घटना भएको भन्दै उनले फर्केलगत्तै बाढीपहिरो पीडितलाई भेट्न आएको बताए । दुई थोपा रगत रहदासम्म आफु जनताको सेवामा तत्पर रहेको भन्दै गुरुङले जलजला गाउँपालिका वडा नम्बर ७ स्थित धाइरिङ र वडा नम्बर ८ नाग्लीवाङका ६० परिवारलाई त्रिपाल बितरण गरेका छन् ।
बाढीपहिरो पीडितको पीडाले आफुलाई समेत दुखित बनाएको भन्दै उनले देश बिदेशमा रहेका निकायबाट थप राहतका लागि पहल गर्ने काँग्रेस नेता गुरुङले बताए । आफु बिदेश भएका कारण पीडित परिवारलाई समयमा भेट्न नपाएको भन्दै उनले पीडित परिवारको आवश्यकता र माग पुरा गर्न भरपूर लाग्ने प्रतिबद्धता उनले जनाएका थिए । उनले जनतालाई पीडा हुँदा काँग्रेस र कम्युनिष्टका रुपमा हेर्न नहुने भन्दै गुरुङले पीडितको मागलाई सम्बोधन गर्न सरकारलाई आग्रह पनि गरे ।
उनले १५ परिवारलाई भाडा र कम्मल समेत प्रदान गरेका थिए । नेपाल रेडक्रस सोसाइटीको सहयोगमा ती पीडित परिवारलाई भाडा र कम्मल बितरण गरिएको थियो । गत साउन १ गत राती आएको भिषण बाढीपहिरोमा परी जलजला गाउँपालिका वडा नम्बर ८ का एक जनाको ज्यानसमेत गएको थियो । पहिरोमा परी वडा नम्बर ७ मा पाँच जना घाइते भएका थिए । जलजला गाउँपालिकामा झण्डै एक सय बढी परिवार प्रभावित भएका थिए ।
जलजला ७ मा राहत बितरण कार्यक्रममा वडा अध्यक्ष टुंङ्गनाथ शर्माले पीडित परिवारलाई त्रिपाल, भाडा र कम्मल बितरण गरेकोमा काँग्रेस नेता गुरुङलाई धन्यबाद दिए । कार्यक्रममा जलजला गाउँपालिकाका कार्यवाहक अध्यक्ष सिमा गर्बुजा पुन, वडा नम्बर ४ का अध्यक्ष एवम् विपत ब्यवस्थापन समितिका संयोजक भिष्म मल्ल, नेपाल रेडक्रस सोसाइटी पर्वतका सभापति रुद्रबहादु्र रिमाल, काँग्रेस जिल्ला सदस्य लेखबहादुर गुरुङ, डा.चुडामणी शर्मा, कुलप्रसाद उपाध्याय, महाधिवेशन प्रतिनिधि रुद्रलाल उपाध्यायलगायतले बोलेका थिए ।
यसैगरी गुरुङले जलजला गाउँपालिका वडा नम्बर ८ का बाढी पहिरो पीडित परिवारलाई नगद हस्तान्तरण गरे । जलजला गाउँपालिकाले पीडित परिवारलाई बितरणका लागि निर्णय गरेको नगद राहत रकम उनले पीडित परिवारलाई बुधबार एक कार्यक्रमका बिच हस्तान्तरण गरेका हुन ।
घर पुर्ण क्षति भएका ११ परिवारलाई जनही २५ हजार रुपैयाँको दरले गाउँपालिकाले उपलब्ध गराएको रकम पीडित परिवारलाई हस्तान्तरण गरिएको हो । जलजला गाउँपालिका वडा नम्बर ८ का वडा अध्यक्ष हरिविकास जिसीले आफ्नो वडाका पीडित सबै परिवारले नगदसहितको राहत पाउने बताए । उनले नाग्लीवामा १६ परिवारको घर पूर्ण क्षति, ३३ घर उच्च जोखिम र ४२ घर प्रभावित भएको पनि जानकारी दिए ।
