पकेट क्षेत्रमै सुन्तलाका बोट सुकेपछि कृषक निराश

सात रोपनी क्षेत्रफलमा सुन्तला खेती गर्दै आएकी सोही ठाउँकी डिलकुमारी तिमिल्सिनाले पनि अहिले सुन्तलाका बोट मासेर केरा, कोदो र अदुवा खेती लगाएको बताइन् । बगैंचामा रहेका सुन्तलाका सबै बोट मरेपछि सुन्तलाका दाउरा बनाइएको छ । लामो समयदेखि सुन्तलाको व्यावसायिक खेती गर्दै आएका कृषकहरू विस्थापित हुँदै गएको स्थानीय दाताराम चापागाँईले जानकारी दिए ।

पातहरूमा पँहेलो र हरियो भाग मिसिएको रङ देखिँदै फल सानो, बांगो, स्वादमा गुणस्तर घट्दै जाने र बीउ असमान बन्दै जान थालेको भन्दै तिमिल्सिनाले क्रमश: कमजोर हुँदै गएर रुख मर्ने यसको समस्या रहेको बताइन् । संक्रमित रुख तुरुन्त उखेल्ने र नष्ट गरेर त्यहाँको हावापानी अनुसारको खेती गर्नु नै उत्तम विकल्प हुने उनको सुझाव छ । तिमिल्सिनाले त्यो ठाउँमा अम्लीय जातका फलफूलको विकल्पको रूपमा केरा, कफी, कोदो, अदुवा, अम्बा, बेसारलगायतका खेती गर्न सकिने सुझाव दिइन् । यहाँका झण्डै १५० परिवार व्यावसायिक सुन्तला खेती गर्दै आएका थिए । सुन्तला खेतीमा समस्या आएपछि कृषकको आकर्षण घट्दै गएको स्थानीय भूमिराज शर्माले बताए ।